Zinedine Zidane បានបង្ហើបប្រាប់ពីការវិលមកកាន់តំណែងជាអ្នកគ្រប់គ្រងវិញចំពេលមានទំនាក់ទំនងជាមួយនឹងកន្លែងទំនេរក្នុងពេលឆាប់ៗនេះនៅក្លឹប Bayern Munich។
Zidane បានចូលរួមការបញ្ចាំងភាពយន្តឯកសារអំពីអតីតគ្រូបង្វឹកអ៊ីតាលី និង Juventus លោក Marcello Lippi ហើយក៏បានឆ្លៀតពិភាក្សាអំពីអនាគតផ្ទាល់ខ្លួនរបស់គាត់នៅក្នុងកម្មវិធីនោះផងដែរ។ គ្រូបង្វឹកសញ្ជាតិបារាំងរូបនេះត្រូវបានផ្សារភ្ជាប់យ៉ាងជិតដិតជាមួយនឹងក្រុមយក្សអាឡឺម៉ង់ បន្ទាប់ពីពួកគេបានប្រកាសថាពួកគេនឹងចែកផ្លូវជាមួយ Thomas Tuchel នៅចុងរដូវកាលនេះ។
នៅពេលត្រូវបានសួរពាក់ព័ន្ធនឹងលទ្ធភាពនៃការវិលត្រឡប់ចូលពិភពបាល់ទាត់វិញ គាត់បាននិយាយថា “ប្រាកដណាស់ អ្វីៗអាចកើតឡើងបានដែរ។ ឥឡូវនេះខ្ញុំកំពុងធ្វើរឿងផ្សេងទៀតពិតមែន ប៉ុន្តែខ្ញុំពិតជាចង់ត្រលប់ទៅឈរនៅជិតកៅអីបម្រុងឡើងវិញ”។ គ្រូបង្វឹកវ័យ 51 ឆ្នាំរូបនេះបានឃ្លាតពីបាល់ទាត់ចាប់តាំងពីការចាកចេញពីក្លឹប Real Madrid នៅឆ្នាំ 2021 ហើយតែងតែត្រូវបានសារព័ត៌មានជាច្រើនដាក់សំណួរពីពេលវេលាដែលលោកអាចត្រឡប់មកវិញ។ Zinedine Zidane ធ្លាប់ជួយអោយ Real Madrid លើកពានរហូតដល់ទៅ 11 ដង អំឡុងការដឹកនាំចន្លោះពីឆ្នាំ 2016 នឹង 2021៕
