Manchester City ប្រឈមនឹងរឿងក្តីកម្រិតតុលាការជាន់ខ្ពស់ពីម៉ាកសំលៀកបំពាក់ Superdry ជុំវិញការរំលោភសិទ្ធិផ្ទាល់លើអាវហ្វឹកហាត់របស់ពួកគេ។
នៅរដូវក្តៅនេះ City បានប្រកាសថាក្រុមហ៊ុនផលិតស្រាបៀរ Asahi នឹងដាក់ពាក្យ Asahi Super “Dry” នឹងមាននៅលើឈុតហ្វឹកហាត់ទាំងបុរស និងស្ត្រី ក៏ដូចជាម៉ាកយីហោ Asahi Super “Dry” 0.0% ដែលគ្មានជាតិអាល់កុលផងដែរ ប៉ុន្តែបើយោងតាមសារព័ត៌មាន The Telegraph បានទម្លាយថាក្រុមហ៊ុនសម្លៀកបំពាក់ល្បី Superdry កំពុងអះអាងថាឈ្មោះទាំងពីរ គឺមានភាពស្រដៀងនឹងយីហោរបស់ពួកគេ។ កាលពីខែធ្នូ ពួកគេបានដាក់សំណើសុំដីកាហាមឃាត់ Man City មិនឲ្យប្រើពាក្យនេះនៅលើអាវហ្វឹកហាត់របស់គេទៀតឡើយ។
ប្រសិនបើដីកាដែលបានដាក់ចេញដោយដោយ Superdry ត្រូវបានអនុញ្ញាតដោយតុលាការជាន់ខ្ពស់ នោះ Man City នឹងត្រូវបំផ្លាញ ឬកែប្រែទំនិញទាំងអស់ដែលនឹងបង្កើតជាការបំពានលើដីកាបង្គាប់។ នេះជាការឡើងតុលាការចុងក្រោយដែល Man Cityត្រូវប្រឈមមុខ។ ក្រុមមួយនេះបានយកឈ្នះរឿងក្តីពាក់ព័ន្ធនឹងការហាមប្រាមមិនអោយលេងបាល់ទាត់អឺរ៉ុបរបស់ពួកគេដោយតុលាការអាជ្ញាកណ្តាលសម្រាប់កីឡាក្នុងឆ្នាំ 2020 ប៉ុន្តែការចោទប្រកាន់ផ្នែកហិរញ្ញវត្ថុដែល Premier League យកមកប្រឆាំងនឹងក្លឹបកាលពីឆ្នាំមុនអាចចំណាយពេលច្រើនឆ្នាំដើម្បីដោះស្រាយ៕
