លោក Jurgen Klopp បានទម្លាយអោយដឹងនៅពេលដែលគាត់ចង់ឱ្យ Mohamed Salah ធ្លាក់ចេញពីការប្រកួត AFCON ដោយគ្រូបង្វឹកក្រុមហង្សក្រហមបានផ្តល់ចម្លើយដ៏ស្មោះត្រង់បំផុត ប៉ុន្តែអាចបង្កជាការខកចិត្តសម្រាប់អ្នកគាំទ្រក្រុមជម្រើសជាតិអេហ្ស៊ីប។
ដំណើររបស់អេហ្ស៊ីបក្នុងការប្រកួតទ្វីបអាហ្រ្វិកដែលគ្រោងនឹងធ្វើនៅឆ្នាំនេះក្នុងប្រទេសកូតឌីវ័រនឹងចាប់ផ្តើមនៅថ្ងៃទី 14 ខែមករាខាងមុខទល់នឹងប្រទេសម៉ូសំប៊ិក។ ដោយសារតែការចូលរួមរបស់ Salah ក្នុងការប្រកួតពានរង្វាន់ Africa Cup of Nations ឆ្នាំ 2023 ខ្សែប្រយុទ្ធរូបនេះអាចនឹងខកខានការប្រកួតចំនួន 8 សម្រាប់ក្រុម Liverpool រួមទាំងការប៉ះទង្គិចគ្នាជាមួយក្រុម Arsenal ក្នុងពានរង្វាន់ FA Cup នៅថ្ងៃសៅរ៍នេះផងដែរ។ អវត្តមានរបស់គាត់អាចនឹងធ្វើឱ្យមានការប៉ះពាល់ជាខ្លាំងដល់ដណ្តើមពានរបស់ហង្សក្រហមរដូវកាលនេះ ហើយ Klopp បានសម្តែងថា វាជារឿងមិនសមហេតុផលសម្រាប់គាត់ក្នុងការជូនពរខ្សែប្រយុទ្ធជួរមុខរបស់គាត់ និង Wataru Endo ឱ្យជួបតែសំណាងល្អមុនការចូលរួមក្នុង AFCON និង Asian Cup រៀងៗខ្លួន។
ថ្លែងទៅកាន់អ្នកសារព័ត៌មាន លោក Klopp បាននិយាយទាំងលេងសើចថា “ខ្ញុំបាននិយាយថា ប្រសិនបើខ្ញុំសូមជូនពរឱ្យពួកគេសំណាងល្អ វានឹងក្លាយជាការកុហក។ ខ្ញុំសង្ឃឹមថា ពួកគេនឹងត្រូវធ្លាក់ក្នុងវគ្គចែកពូល ប៉ុន្តែវាមិនអាចទៅរួចនោះទេ។ សូមសំណាងល្អ ហើយសង្ឃឹមថាពួកគេអាចត្រលប់មកវិញដោយមិនមានរបួស ហើយសុខភាពល្អ។ ពេលនេះពួកយើងនឹងព្យាយាមស្វែងរកអ្នកដែលអាចជំនួសតំណែងពួកគេជាមុនសិន”៕
