Andre Onana បានធ្វើការឆ្លើយតបទៅវិញយ៉ាងសាមញ្ញាជាទីបំផុត ចំពោះការចោទប្រកាន់ពីកីឡាករ Virgil van Dijk ថាខ្លួនពូកែលេងខ្ជះខ្ជាយពេលវេលាអំឡុងការប្រកួតរវាង Liverpool នឹង Manchester United។
Van Dijk និងមិត្តរួមក្រុមនៅ Liverpool របស់គាត់មិនអាចទម្លាយសំណាញ់ទីរបស់ Onana ដោយអ្នកចាំទីរូបនេះបានសង្គ្រោះបាល់ចំនួនប្រាំបីលើកនៅ Anfield ខណៈដែល United បានយកមួយពិន្ទុត្រឡប់ទៅទីក្រុង Manchester វិញ។ បន្ទាប់ពីការប្រកួត ប្រធានក្រុម Liverpool ត្រូវបានគេរាយការណ៍ថាបានប្រឈមមុខនឹងអ្នកចាំទីរបស់បិសាចក្រហម ហើយបានចោទប្រកាន់គាត់ថាខ្ជះខ្ជាយពេលវេលា។
យោងតាមសារព័ត៌មាន talkSPORT បន្ទាប់ពីការប្រកួត Van Dijk បានចូលទៅជិត Onana ហើយបាននិយាយថា “ដោយសារតែអ្នក ពួកយើងលេងបានតែកន្លះម៉ោងប៉ុណ្ណោះ”។ នៅពេលលឺបែបនេះ អ្នកចាំទីសញ្ជាតិកាមេរូន មិនបានធ្វើការនិយាយតបទៅកាន់ van Dijk វិញនោះឡើយ ដោយរូបគេគ្រាន់តែញញឺមប៉ុណ្ណោះ មុនដើរចេញដោយធម្មតា”៕
