Eddie Howe បានបង្ហើបថាគាត់នឹងចូលរួមជាចំណែកក្នុងការប្រកួត Champions League ដោយផ្ទាល់ជាលើកដំបូងនៅយប់ថ្ងៃអង្គារនៅពេលដែល Newcastle ត្រូវប៉ះជាមួយជើងខ្លាំងមកពីអ៊ីតាលី ពោលគឺក្រុម AC Milan។
ខណៈដែល Newcastle United នឹងត្រូវលេងក្នុងក្របខ័ណ្ឌ UEFA Champions League ជាលើកដំបូងក្នុងរយៈពេលជិត 20 ឆ្នាំ អ្នកចាត់ការ Eddie Howe បានបង្ហើបថានេះនឹងក្លាយជាលើកដំបូងដែលគាត់នឹងមើលការប្រកួត Champions League ដោយផ្ទាល់។ បន្ថែមពីនេះ នៅក្នុងសន្និសីទកាសែត Champions League លើកដំបូងរបស់គាត់ Howe បានមកដល់យឺត ដោយសារមានបញ្ហាជាមួយជើងហោះហើរពីអង់គ្លេស។
បន្ទាប់ពីជើងហោះហើររបស់ក្រុមទាំងមូលត្រូវបានលើកពេលរហូតដល់ទៅ 2 ម៉ោង លោក Eddie Howe បាននិយាយក្នុងសន្និសីទកាសែតថា “ខ្ញុំមិនដែលចូលរួមការប្រកួតបែបនេះឡើយ ខ្ញុំរវល់ធ្វើការពេក ដូចនេះយប់ស្អែកនឹងក្លាយជារាត្រីដ៏គួរឲ្យចងចាំមួយ”៕
