ក្លឹប Al-Ittihad របស់ Saudi Pro League ត្រូវបានគេរាយការណ៍ថាបានបង្កើនចំណាប់អារម្មណ៍របស់ពួកគេលើអតីតប្រធានក្រុម Real Madrid កីឡាករ Sergio Ramos ដើម្បីមកជួបជុំជាមួយ Karim Benzema។
Al-Ittihad មានបំណងចង់បន្ថែមខ្សែការពារទៅក្នុងក្រុមមុនពេលទីផ្សារដោះដូរកីឡាករបិទនៅថ្ងៃទី 7 ខែកញ្ញា ហើយត្រៀមខ្លួនរួចជាស្រេចដើម្បីផ្ទេរយកកីឡាករ Ramos បន្ទាប់ពីអវត្តមានខ្សែការពារ Luiz Felipe របស់ Real Betis នេះបើយោងតាម Foot Mercato ។ ការផ្លាស់ប្តូរបែបនេះនឹងធ្វើឱ្យ Ramos មកជួបជាមួយអតីតមិត្តរួមក្រុម Real Madrid របស់ខ្លួន ពោលគឺ Karim Benzema ម្តងទៀតបន្ទាប់ពីការផ្ទេររបស់គាត់ចេញពី Los Blancos កាលពីដើមរដូវក្តៅនេះ។
Ramos គឺជាកីឡាករគ្មានក្លឹបលេងបន្ទាប់ពីចាកចេញពី Paris Saint-Germain ប៉ុន្តែមានជម្រើសផ្សេងទៀតដែលត្រូវពិចារណា។ ក្លឹបធំៗនៅទួរគីរួមមាន Besiktas និង Galatasaray ក៏ចង់បានខ្សែការពារកណ្តាលរូបនេះផងដែរ។ Ramos ប្រហែលជាត្រូវសម្រេចចិត្តយ៉ាងឆាប់រហ័សប្រសិនបើគាត់ចង់ទៅលេងនៅ Turkish Super Lig ដោយសំណើរបស់ Besiktas ដែលមានតម្លៃជាង 8 លានអឺរ៉ូក្នុងមួយឆ្នាំនឹងត្រូវផុតកំណត់នៅថ្ងៃច័ន្ទខាងមុខនេះ៕
