ក្លឹប Barcelona ត្រូវបានគេរាយការណ៍ថានឹងប្រើប្រាស់គ្រប់មធ្យោបាយដើម្បីទិញខ្សែការពារ Joao Cancelo របស់ Manchester City ប៉ុន្តែក្នុងពេលនេះដែរ ក្លឹបត្រូវតែលក់កីឡាករពីរនាក់មុនសិន។
បើយោងតាមសារព័ត៌មាន Mundo Deportivo ក្លឹបកាតាឡានមួយនេះកំពុងជំរុញឱ្យចុះហត្ថលេខាលើខ្សែការពារស្តាំពីក្លឹបនៅ Premier League ខណៈដែលខ្សែការពាររូបនេះមិនសូវទទួលបានការពេញចិត្តដោយលោក Pep Guardiola នោះឡើយ។ អ្នកចាត់ការសញ្ជាតិអេស្ប៉ាញបានដាក់ចិត្តដាក់កាយរបស់ខ្លួនទៅ Kyle Walker ដោយបានរារាំងគាត់មិនឱ្យចូលរួមជាមួយក្លឹប Bayern Munich ជាហេតុធ្វើឲ្យ Cancelo គ្មានជម្រើសអ្វីក្រៅពីការចាកចេញនោះឡើយ។
ទោះជាយ៉ាងណាក៏ដោយ Barcelona ត្រូវតែលក់កីឡាករយ៉ាងហោចណាស់ពីរនាក់ ហើយប្រើប្រាស់លុយដែលបានមកពីការលក់ភាគហ៊ុន Barca Vision ដើម្បីសម្រេចការផ្ទេរ។ គិតត្រឹមពេលនេះ កីឡាករដូចជា Clement Lenglet និង Sergino Dest ត្រូវបានគេជូនដំណឹងថាអនាគតរបស់ពួកគេអាចនឹងបញ្ចប់នាពេលឆាប់ៗនៅកីឡដ្ឋាន Camp Nou ហើយថ្នាក់ដឹកនាំក្លឹបកំពុងសម្លឹងរកការដកខ្សែការពារទាំងពីរចេញ។ Barcelona ក៏កំពុងពិចារណាលើកិច្ចព្រមព្រៀងខ្ចីជើងសម្រាប់ Cancelo ដោយមិនដាក់ចូលជម្រើសទិញផ្តាច់ ឬលក្ខខណ្ឌទិញដែលនឹងកើតឡើងលុះត្រាតែគោលដៅជាក់លាក់ណាមួយត្រូវបានសម្រេច៕
