ខ្សែបម្រើវ័យចំណាស់ Andres Iniesta នឹងមិនជួបជុំជាមួយ Lionel Messi, Jordi Alba នឹង Sergio Busquets នៅសហរដ្ឋអាមេរិកនោះទេ ខណៈដែលគាត់ជិតចូលរួមជាមួយក្លឹប Emirates Club FC របស់លីកកំពូលអារ៉ាប់រួម UAE Pro League។
វីរបុរសក្លឹប Barcelona គ្រោងនឹងមកដល់ទីក្រុងឌូបៃទ ហើយនឹងចុះហត្ថលេខាជាមួយក្លឹប Emirates Club FC ដែលមានមូលដ្ឋាននៅទីក្រុង Ras Al-Khaimah នេះបើយោងតាមសារព័ត៌មាន Fernando Polo។ កិច្ចសន្យារបស់គាត់នឹងដំណើរការរហូតដល់ខែមិថុនា ឆ្នាំ 2024 ជាមួយនឹងជម្រើសបន្តរហូតដល់មួយឆ្នាំទៀត។
កិច្ចសន្យារបស់ Iniesta ជាមួយក្រុម Vissel Kobe របស់ J-League បានផុតកំណត់នៅរដូវក្តៅនេះ ហើយបច្ចុប្បន្នគាត់គឺជាកីឡាករដែលគ្មានក្លឹបលេងនោះឡើយ។ គាត់ត្រូវបានគេភ្ជាប់ជាមួយនឹងការផ្លាស់ទៅលេងនៅក្លឹប Inter Miami របស់ Major League Soccer ក្នុងរយៈពេលពីរឆ្នាំ ដែលគាត់អាចជួបជាមួយអតីតមិត្តរួមក្រុម Barcelona របស់គាត់ ប៉ុន្តែគាត់បានជ្រើសរើសបន្តលេងនៅទ្វីបអាស៊ី ហើយចូលរួមជាមួយក្លឹប UAE Pro League ជំនួសវិញ៕
