Thomas Tuchel បានបង្ហាញពីអ្វីដែលបានផ្លាស់ប្តូរនៅក្នុងវិធីសាស្រ្តរបស់គាត់ជាមួយក្លឹប Bayern Munich ក្រោយដំណើរទេសចរណ៍មុនបើករដូវកាលថ្មីនៅទ្វីបអាស៊ីកាន់តែខិតមកដល់ទីបញ្ចប់។
ក្រោយការចាកចេញរបស់ Julian Nagelsmann អតីតអ្នកចាត់ការរបស់ Dortmund រូបនេះបានចូលមកកាន់តំណែងនៅ Bayern ភ្លាម ដោយបានជួយឲ្យក្រុមឈ្នះពាន Bundesliga នាសប្តាហ៍ចុងក្រោយយ៉ាងរន្ធត់។ ទម្រង់លេងរបស់ Tuchel មិនសូវជាទទួលបានការគាំទ្រប៉ុន្មានឡើយ ប៉ុន្តែអ្វីៗបានប្រែប្រួលស្ទើរតែទាំងស្រុងសម្រាប់ប៉ុន្មានប្រកួតចុងក្រោយនៃរដូវកាលមុន។
ថ្លែងបន្ទាប់ពីការទទួលជ័យជម្នះក្នុងការប្រកួតមិត្តភាព 1-0 លើក្រុម Kawasaki Frontale លោក Tuchel បាននិយាយថា “រឿងសំខាន់គឺអ្នកត្រូវសម្របខ្លួនទៅនឹងអ្វីដែលក្រុមត្រូវការ។ អ្នកតែងតែផ្លាស់ប្តូរ និងសម្របខ្លួនអាស្រ័យលើកន្លែងដែលក្រុមកំពុងស្ថិតនៅ។ យើងបានហ្វឹកហាត់ច្រើនហើយខ្លាំង ប៉ុន្តែពិតណាស់ការហោះហើរចុះឡើង និងកម្ដៅដើរតួនាទីយ៉ាងសំខាន់នៅទីនេះ។ អ្វីដែលយើងចង់បាននោះគឺ គុណភាពចេញពីកីឡាកររៀងៗខ្លួនសម្រាប់ការប្រកួតក្រោយ”៕
