Erik ten Hag បានរិះគន់កីឡាកររបស់ Manchester United ចំពោះការមិនអនុវត្តតាមច្បាប់របស់គាត់ក្នុងការបរាជ័យក្រោមលទ្ធផល 3-2 ដោយស្នាដៃក្រុម Borussia Dortmund អំឡុងពេលមុនបើករដូវកាល2023-2024។
ក្នុងការប្រកួតមុនរដូវកាលចុងក្រោយនៅសហរដ្ឋអាមេរិក Manchester United បានរងបរាជ័យក្នុងលទ្ធផល 3-2 លើក្រុម Borussia Dortmund ក្នុងទីក្រុង Las Vegas ដោយអ្នកចាត់ការ Ten Hag បានសម្តែងការខកចិត្តរបស់គាត់ចំពោះកីឡាករមួយចំនួនដោយពួកគេមិនបានគោរពតាមការណែនាំរបស់គាត់ ដែលនាំឱ្យមានការលេងមិនសូវល្អ។
ក្រោយការប្រកួត អ្នកចាត់ការសញ្ជាតិហូឡង់បាននិយាយទៅកាន់ប្រព័ន្ធផ្សព្វផ្សាយរបស់ក្លឹបទាំងតឹងទ្រូង “តង់ដំបូងគឺពួកយើងធ្វើបានល្អ លេងជាក្រុម មានកម្លាំងខ្លាំង កម្លាំងល្អ។ ដូច្នេះវាពិតជារីករាយណាស់ដែលបានឃើញ ហើយនោះជាអ្វីដែលខ្ញុំចង់និយាយនៅពាក់កណ្តាលតង់ ប៉ុន្តែភ្លាមៗនោះពួកគេបានធ្លាយគ្រាប់បាល់ដល់ទៅពីរគ្រាប់។ ពួកគេមិនបានធ្វើតាមអ្វីដែលខ្ញុំបានប្រាប់ទាល់តែសោះ ដោយពួកគេលេងគ្មានភាពជាក្រុមនៅតង់ទីពីរ មើលទៅដូចជាកីឡាករ 11 នាក់លេងតាមរបៀបរៀងៗខ្លួនយ៉ាងគ្មានសណ្តាប់ធ្នាប់”៕
