ក្លឹបញញួរយក្ស West Ham United ច្បាស់ជាមានការអាក់អន់ស្រពន់ចិត្តជាខ្លាំង នៅពេលដែលសំណើរតម្លៃរហូតដល់ទៅ 20 លានផោន រឺប្រមាណ 25.8 លានដុល្លារ ត្រូវបានច្រានចោលភ្លាមៗពីក្លឹបបិសាចក្រហម Manchester United សម្រាប់ហត្ថលេខារបស់កំពូលខ្សែការពារមួយរូបនេះ។
បន្ទាប់ពីលក់កីឡាករ Declan Rice ឲ្យទៅ Arsenal ក្នុងតម្លៃបំបែកកំណត់ត្រា 105 លានផោនរួចមក West Ham បានលូកដៃចូលក្នុងទីផ្សារដោះដូរកីឡាករនារដូវក្តៅនេះភ្លាមៗ ដោយបានសម្លឹងឃើញសក្តានុពលរបស់អតីតប្រធានក្រុម Man Utd កីឡាករ Harry Maguire ដោយបានដាក់ចិត្ដដាក់កាយលើតុចរចារ ហើយបានបញ្ចូល 20 លានផោនទៅក្នុងការពិភាក្សាដែល Man Utd ជឿថាជាចំនួនដែលមិនអាចទទួលយកបាន។
វាមិនមែនជារឿងដែលចម្លែកនោះទេដែល David Moyes ចង់បាន Maguire មកលេងជាខ្សែការពារជាប់លាប់ ប៉ុន្តែក្លឹបមួយនេះមានភាពស្រពិចស្រពិលក្នុងការតាមចែចូល Maguire បន្ថែមទៀតដោយសារតែខ្សែការពារកណ្តាលសញ្ជាតិអង់គ្លេសរូបនេះហាក់មិនមានបំណងចង់ចាកចេញពីក្រុមមានមូលដ្ឋាននៅទីក្រុង Manchester នោះឡើយ។
