ក្លឹបបាល់ទាត់ Inter Miami បានប្រកាសពីការចុះហត្ថលេខាលើអតីតវីរបុរសក្លឹប Barcelona Jordi Alba ដោយបានជុំគ្នាម្តងទៀតជាមួយ Lionel Messi និង Sergio Busquets ក្នុងលីកកំពូលអាមេរិក Major League Soccer ។
Inter បានប្រកាសទិញយក Alba ភ្លាមៗបន្ទាប់ពីការចុះហត្ថលេខាលើ Messi និង Busquets។ គាត់បានចុះកុងត្រាមួយរដូវកាល ប៉ុន្តែក្លឹបមានជម្រើសក្នុងការបន្តកុងត្រានេះមួយឆ្នាំទៀត។ Alba ប្រហែលជាមិនមែនជាអតីតកីឡាករចុងក្រោយរបស់ Barcelona ដែលបានផ្លាស់ទៅនោះទេ ដោយមានរបាយការណ៍បង្ហាញថា Miami ចង់ល្បួង Andres Iniesta នឹងកីឡាករ Luis Suarez ឱ្យមកលេងនៅ MLS ថែមទៀតផង។
លោក Chris Henderson នាយកផ្នែកកីឡារបស់ Inter Miami បាននិយាយថា “Jordi គឺជាកីឡាករដែលមានភាពស្វាហាប់ និងមានបទពិសោធន៍ ហើយយើងរំភើបក្នុងការនាំយកគាត់ដើម្បីបន្តពង្រឹងក្រុមរបស់យើង។ ភាពរឹងមាំនៃខ្សែការពារ និងសមត្ថភាពរបស់គាត់ក្នុងការរួមចំណែកក្នុងការវាយប្រហារ។ យើងដឹងថាគាត់នឹងជួយ Inter Miami ឱ្យសម្រេចបាននូវគោលបំណងរបស់ក្លឹបនៅរដូវកាលនេះ និងលើសពីនេះទៅទៀត”៕
