ភាគហ៊ុនរបស់ក្លិបបិសាចក្រហម Manchester United បានកើនឡើងយ៉ាងខ្លាំងក្នុងរយៈពេល 24 ម៉ោងចុងក្រោយបន្ទាប់ពីមានរបាយការណ៍ថាការដេញថ្លៃរបស់ Sheikh Jassim ដើម្បីទិញក្លិប បានទទួលភាពជោគជ័យ។
រជ្ជកាលនៃការកាន់កាប់ដ៏យូររបស់ Manchester United អាចនឹងឈានដល់ទីបញ្ចប់ បន្ទាប់ពីភាគហ៊ុននៅក្នុងក្លិបបានកើនឡើង ក្រោយមានរបាយការណ៍នៅក្នុងប្រទេសកាតាថា Sheikh Jassim bin Hamad Al Thani បានផ្តួលក្រុមហ៊ុន INEOS ក្នុងការប្រជែងទិញយកបិសាចក្រហម។ ភាគហ៊ុនរបស់ Man Utd នៅផ្សារហ៊ុនញូវយ៉កបានកើនឡើងពី 19.20 ដុល្លារកាលពីព្រឹកថ្ងៃច័ន្ទដល់កម្រិតខ្ពស់បំផុតនៃ 25.01 ដុល្លារនៅចុងបញ្ចប់នៃថ្ងៃដែលជាការកើនឡើងរហូតទៅដល់ 24.20 ភាគរយ។
កាសែតកាតា Al-Watan បានរាយការណ៍កាលពីយប់ថ្ងៃចន្ទថា Sheikh Jassim បានសម្រេចក្នុងការបញ្ចុះបញ្ចូលគ្រួសារ Glazer លក់ក្លឹបភ្លាមៗ ហើយថាគាត់ត្រូវបានផ្តល់ភ្លើងខៀវឱ្យបន្តការកាន់កាប់។ Sheikh Jassim ដែលជាកូនប្រុសរបស់អតីតនាយករដ្ឋមន្ត្រីកាតា បានធ្វើការដេញថ្លៃចំនួនប្រាំដងសម្រាប់ក្លឹបនេះ រួមទាំងពីរបន្ទាប់ពីថ្ងៃផុតកំណត់ដែលកំណត់ដោយ Raine Group ដែលជាអ្នកនៅពីក្រោយការរៀបចំការលក់។
