Paolo Maldini ត្រូវបានគេរាយការណ៍ថាបានលាលែងពីតួនាទីជានាយកបច្ចេកទេសរបស់ក្លិប AC Milan ខណៈដែលលោក Ricky Massara ក៏ត្រូវបានបញ្ឈប់ពីការងារនៅ San Siro ដូចគ្នា។
បើយោងទៅតាមការរាយការណ៍របស់កាសែតអ៊ីតាលី Calciomercato បានឲ្យដឹងថា ការសម្រេចចិត្តទាំងនេះត្រូវបានធ្វើឡើងក្រោយជំនួបរវាងថ្នាក់ដឹកនាំទាំងអស់ នឹងប្រធានក្លិបលោក Gerry Cardinale បានធ្វើឡើងកាលពីថ្ងៃច័ន្ទកន្លងទៅ។
ការពិភាក្សានោះត្រូវបានគេនិយាយថាមានរយៈពេលខ្លី ដោយប្រធានរបស់ក្រុមហ៊ុន RedBird លោក Cardinale បានសម្រេចចិត្តចែកផ្លូវជាមួយ Maldini និង Massara ។ អ្នកទាំងពីរធ្លាប់ទទួលបន្ទុកលើការផ្ទេរ និងកិច្ចសន្យាចរចា ប៉ុន្តែការជជែកដេញដោលគ្នាទាក់ទងនឹងយុទ្ធសាស្ត្រជ្រើសរើស និងការវិនិយោគលើកីឡាករថ្មីត្រូវបានគេនិយាយថាបាននាំឲ្យមានការរៀបចំរចនាសម្ព័ន្ធឡើងវិញនៅលើកំពូលនៃក្រុមដែលកំពុងលេងនៅក្របខ័ណ្ឌ Serie A ៕
