អ្នកចាំទីដៃស្អិត Emiliano Martinez បានអះអាងយ៉ាងមុតមាំថាគាត់នឹងប្រើប្រាស់គ្រប់វិធីដើម្បីលួង Lionel Messi ឲ្យមកលេងនៅ Aston Villa បន្ទាប់ពីឃើញស្ថានភាពដែលតានតឹងរវាង Messi នឹង Paris Saint-Germain។
ម្ចាស់ពាន Ballon d’Or 7 សម័យរូបនេះកំពុងតែខិតជិតទៅក្លាយជាកីឡាករគ្មានក្លិបលេងនៅរដូវក្តៅនេះ ដោយកិច្ចសន្យារបស់គាត់នៅក្លិបយក្ស Ligue 1 Paris Saint-Germain នឹងផុតកំណត់។ Messi ត្រូវបានគេទាក់ទងយ៉ាងខ្លាំងជាមួយនឹងការត្រឡប់ទៅ Barcelona វិញ ខណៈដែលគាត់ក៏ត្រូវបានគេនិយាយថាមានការផ្តល់កុងត្រាពីមជ្ឈិមបូព៌ា និង MLS។ ទោះបីជាយ៉ាងណា Martinez ចង់ឃើញមិត្តរួមក្រុមជម្រើសជាតិអាហ្សង់ទីនរបស់ខ្លួន ចូលរួមជាមួយគាត់ក្នុងក្របខ័ណ្ឌ Premier League ដោយកីឡាកររូបនេះបានរៀបចំកាត់ប្រាក់ខែរបស់គាត់ ដើម្បីធ្វើកិច្ចព្រមព្រៀងដ៏គួរឲ្យចាប់អារម្មណ៍កើតឡើង។
ម្ចាស់ស្រោមដៃមាសព្រឹត្តិការណ៍បាល់ទាត់ពិភពលោក ឆ្នាំ 2022 រូពនេះបានឲ្យដឹងថា “ប្រសិនបើ Leo ត្រូវបានអ្នកគាំទ្រមិនពេញចិត្តនៅ PSG ខ្ញុំនឹងនាំគាត់ទៅ Aston Villa ។ ខ្ញុំនឹងប្រើប្រាស់ងារជាមិត្តដើម្បីទាក់ទាញគាត់មក ខ្ញុំនឹងធ្វើម្ហូបឲ្យគាត់រាល់ចុងសប្តាហ៍ ខ្ញុំនឹងស្នើសុំឲ្យអ្នកគាំទ្រធ្វើទង់ជាតិដែលតំណាងឲ្យ Messi ហើយធ្វើឲ្យគាត់មានពេលវេលាល្អឡើងវិញ។ បើសិនជាចាំបាច់ ខ្ញុំសុខចិត្តកាត់ប្រាក់ខែរបស់ខ្ញុំឲ្យតែ Messi បានមក Aston Villa”៕
