Mauricio Pochettino ពេលនេះបានវិវត្តខ្លួនជាបេក្ខភាពនាំមុខមួយក្នុងចំណោមឈ្មោះអ្នកចាត់ការទូទៅ 4 រូបក្នុងការដឹកនាំនៅ Stamford Bridge ហើយកីឡាករ Chelsea នឹងស្វាគមន៍ការមកដល់របស់គាត់នៅក្លិប។
ក្រុមតោខៀវបានធ្វើការពិភាក្សាយ៉ាងវិជ្ជមានជាបន្តបន្ទាប់ជាមួយ Pochettino នៅពេលដែលពួកគេបន្តស្វែងរកគ្រូបង្វឹកអចិន្ត្រៃយ៍ថ្មី នេះបើយោងតាមកាសែត The Telegraph ។ ការរំពឹងទុកនៃការមកដល់របស់ Pochettino ក៏ត្រូវរាប់បញ្ចូលយ៉ាងល្អនៅក្នុងបន្ទប់ស្លៀកពាក់។ អ្វីដែលបានចេញផ្សាយនោះគឺ កីឡាករមានភាពសុទិដ្ឋិនិយមជាខ្លាំងចំពោះការមកដល់របស់គ្រូបង្វឹកសញ្ជាតិអាហ្សង់ទីន ហើយពេញចិត្តចំពោះសមត្ថភាពគ្រូបង្វឹក ជំនាញនៃលើកទឹកចិត្ត និងបទពិសោធន៍ដ៏ជោគជាំរបស់គាត់។
បច្ចុប្បន្នលោក Pochettino កំពុងឈរលើគេក្នុងបញ្ជីរបស់ Chelsea នាំមុខលោក Vincent Kompany ដែលជាគ្រូបង្វឹក Burnley និងបេក្ខជនម្នាក់ទៀត។ វាមិនច្បាស់ទេថាតើនរណាជាឈ្មោះទីបីក្នុងបញ្ជីរបស់ Chelsea ជានរណានៅឡើយ ក្រោយការដកខ្លួនចេញពីបញ្ជីដោយលោក Julian Nagelsmann នឹង Luis Enrique ក្នុងការមកជំនួសលោក Graham Potter ដែលបានស្គាល់រសជាតិដឹកនាំក្រុម Chelsea មិនដល់មួយឆ្នាំផងនោះ។ គួររំលឹកផងដែរថា Pochettino មិនទាន់មានការងារអ្វីនៅឡើយ ក្រោយពីការបណ្តេញចេញពីតំណែងគ្រូបង្វឹករបស់ក្រុម Paris Saint-Germain កាលពីខែកក្កដា ឆ្នាំ 2022 តែពេលនេះការត្រឡប់មកវិញរបស់គាត់អាចនឹងកៀកចូលមកដល់វិញហើយ៕
ប្រភព : The Telegraph
