បន្ទាប់ពីទទួលបានដំណឹងថា ហង្សក្រហម Liverpool ត្រូវប៉ះក្រុម Real Madrid សារជាថ្មីនៅការប្រកួតវគ្គ 16ក្រុមចុងក្រោយនៃពាន UEFA Champions League ស្រាប់តែលេចដំណឹងថ្មីថា ម្ចាស់ក្លិប Liverpool ក្រុមហ៊ុន Fenway Sports Group រឺ FSG បានសម្រេចដាក់លក់ក្លិបមួយនេះ។
យោងទៅតាមសារព័ត៌មាន The Athletic បានឲ្យដឹងថា FSG បានសម្រេចដាក់លក់ភាគហ៊ុនស្ទើរតែទាំងស្រុងរបស់ Liverpool FC ជាសាធារណះ ដើម្បីស្វែងរកភាគីដែលមានចំណាប់អារម្មណ៍រឺមានភាពរួចរាល់ក្នុងការទិញយកភាគហ៊ុនរបស់ FSG។
គួររំលឹកផងដែរថា សេដ្ឋីអាមេរិក លោក John W. Henry ដែលជាប្រធានក្លិប Liverpool បានទិញក្រុមហង្សក្រហមតាំងពីខែតុលា ឆ្នាំ 2010 ក្នុងតម្លៃប្រមាណ 300លានផោន រឺ 344លានដុល្លារ ពីលោក George Gillett និង Tom Hicks ហើយបានជួយកែប្រែមុខមាត់ Liverpool ច្រើន ជាពិសេសការតែងតាំងលោក Jurgen Klopp ដោយធ្វើឲ្យ Liverpool បច្ចុប្បន្នមានតម្លៃប្រមាណ 3.6ពាន់លានផោន រឺ 4.45ពាន់លានដុល្លារ៕
ប្រភព : The Athletic
