លោក Jurgen Klopp នឹងធ្វើការវិលត្រឡប់ទៅកាន់កីឡដ្ឋាន Anfield របស់ក្រុមហង្សក្រហម Liverpool នាខែក្រោយ បន្ទាប់ពីទើបតែបានចុះចេញពីតំណែងជាផ្លូវការនៅចុងរដូវកាល 2023-2024 ក្រោមមូលហេតុដែលមិនមានពាក់ព័ន្ធជាមួយបាល់ទាត់នោះឡើយ។
យុគសម័យ Klopp នៅ Liverpool បានឈានចូលមកដល់កាលពីចុងសប្តាហ៍ ខណៈដែលពួកគេបានយកឈ្នះ Wolves ក្នុងលទ្ធផល 2-0 នៅកីឡដ្ឋាន Anfield ។ នៅក្នុងឈុតឆាករំជួលចិត្តនៅថ្ងៃចុងក្រោយនៃរដូវកាល Premier League គ្រូបង្វឹកសញ្ជាតិអាឡឺម៉ង់បានថ្លែងអំណរគុណដល់កីឡាករ និងអ្នកគាំទ្រសម្រាប់ការគាំទ្ររបស់ពួកគេ ហើយបានប្រាប់អ្នកដែលមានវត្តមានឱ្យបន្តគាំទ្រអ្នកស្នងតំណែងរបស់គាត់ពោលគឺលោក Arne Slot ។ មនុស្សជាច្រើនមិនច្បាស់ថាពេលណាដែលអតីតគ្រូបង្វឹកក្រុម Borussia Dortmund នឹងត្រលប់មក Anfield ទេ ប៉ុន្តែគាត់និងប្រពន្ធរបស់គាត់លោកស្រី Ulla នឹងត្រលប់មកវិញក្នុងរយៈពេលតែប៉ុន្មានសប្តាហ៍ប៉ុណ្ណោះដើម្បីមកមើលការប្រគុំតន្រ្តីរបស់តារាចម្រៀង Taylor Swift ក្នុងកម្មវិធី Era Tour។
នៅក្នុងកិច្ចសម្ភាសន៍មួយនាកីឡដ្ឋាន Anfield មុនពេលចាកចេញ Klopp បានបញ្ជាក់ច្បាស់ថាគាត់នឹងប្រពន្ធ នឹងមកមើល Taylor Swift ច្រៀងនៅក្នុងទឹកដីរបស់ក្រុម Liverpool នាពាក់កណ្តាលខែមិថុនា មុនពេលស្រែកច្រៀងចម្រៀងរបស់តារាល្បីអាមេរិក៕
