ខ្សែការពារ Dani Carvajal របស់ក្លឹប Real Madrid បានបដិសេធជុំវិញការលើកឡើងថាអេស្ប៉ាញជាប្រទេសសំបូរអ្នករើសអើងពូជសាសន៍ បើទោះបីជាមានករណីម្តងហើយម្តងទៀតលើមិត្តរួមក្រុម Vinicius Junior ក៏ដោយ។
Vinicius ត្រូវបានអ្នកគាំទ្រក្នុងប្រទេសអេស្ប៉ាញដាក់គោលដៅក្នុងឧប្បត្តិហេតុជាច្រើន ហើយខ្សែប្រយុទ្ធប្រេស៊ីលបានប្តេជ្ញាតតាំងដោយសន្យាថានឹងបន្តការប្រយុទ្ធប្រឆាំងនឹងការរើសអើងពូជសាសន៍ក្នុងប្រទេសអឺរ៉ុប។ ខ្សែប្រយុទ្ធស្លាបបានស្រក់ទឹកភ្នែកនៅក្នុងសន្និសីទសារព័ត៌មានបន្ទាប់ពីត្រូវបានសួរអំពីបទពិសោធរបស់គាត់អំពីការរើសអើងជាតិសាសន៍ ប៉ុន្តែ Carvajal នៅតែរក្សាជំហរថាអេស្ប៉ាញមិនមែនជាប្រទេសប្រកាន់ពូជសាសន៍នោះទេ។
ខ្សែការពារវ័យចំណាស់រូបនេះបាននិយាយថា គាត់យល់ច្បាស់ពីស្ថានភាពរបស់ Vinicius ជាពិសេសមនុស្សមួយចំនួនដែលយកបាល់ទាត់ដើម្បីជាទីលានបញ្ចេញកំហឹងនឹងមតិរបស់ខ្លួន ប៉ុន្តែអេស្ប៉ាញជារួមគឺមិនមែនជាប្រទេសដែលរើសអើងពូជសាសន៍នោះឡើយ។ Carvajal ក៏បានលើកឡើងពីប្រវត្តិរបស់ខ្លួនតាំងពីក្មេង ដោយបានរីកធំធាត់ជាមួយក្មេងៗមកពីតំបន់ផ្សេងៗគ្នានៃអេស្ប៉ាញ៕
