ក្រុមតោកំណាចអង់គ្លេសនឹងត្រូវប៉ះគ្នាជាមួយក្រុមជម្រើសជាតិបែលហ្សិកក្នុងការប្រកួតមិត្តភាពអន្តរជាតិនៅថ្ងៃអង្គារ ប៉ុន្តែអង់គ្លេសនឹងលេងការប្រកួតតង់ទីពីរដោយគ្មានឈ្មោះនៅលើអាវ។
សហព័ន្ធបាល់ទាត់អង់គ្លេស FA បានបញ្ជាក់ថាតង់ទីពីរនៃការប្រកួតរបស់អង់គ្លេសជាមួយបែលហ្ស៊ិក ដែលជាការប្រកួតកម្ដៅសាច់ដុំសម្រាប់ព្រឹត្តិការណ៍ Euro 2024 លើកទីពីររបស់ពួកគេក្នុងមួយសប្តាហ៍ ដោយក្នុងនោះក្រុមរបស់លោក Gareth Southgate នឹងមិនមានឈ្មោះកីឡាករណាម្នាក់នៅខាងក្រោយអាវរបស់ពួកគេនោះឡើយ ដោយតម្រូវអោយមានតែលេខអាវប៉ុណ្ណោះ។ ការប្រកួតនេះត្រូវបានគេកំណត់ថាជាការរំលឹកទៅដល់សមាគមតំណាងអ្នកកើតជម្ងឺអាល់ហ្សៃមឺអន្តរជាតិ ហើយគំនិតផ្តួចផ្តើមនេះគឺផ្តោតសំខាន់ទៅលើការបាត់បង់ការចងចាំជារោគសញ្ញាសំខាន់នៃជំងឺវង្វេងវង្វាន់។
ជម្ងឺអាល់ហ្សៃមឺគឺជាឈ្មោះសម្រាប់រោគសញ្ញាដែលជាប់ទាក់ទងនឹងការថយចុះជាបន្តបន្ទាប់នៃមុខងារខួរក្បាល ហើយអាចប៉ះពាល់ដល់ការចងចាំ ទម្រង់នៃការនិយាយ និងជំនាញគិត ក៏ដូចជាសមត្ថភាពផ្លូវចិត្តផ្សេងទៀត។ មូលហេតុពិតប្រាកដនៃជំងឺអាល់ហ្សៃមឺ មិនទាន់ត្រូវបានរកឃើញនៅឡើយទេ ហើយប្រទេសអង់គ្លេស និង សហព័ន្ធបាល់ទាត់អង់គ្លេសបានគាំទ្រជាយូរមកហើយនូវគំនិតផ្តួចផ្តើមក្នុងការលើកកម្ពស់ការយល់ដឹងអំពីស្ថានភាពជំងឺ និងជួយធានាបាននូវថវិកាសម្រាប់គម្រោងស្រាវជ្រាវ និងអ្នកដែលរងផលប៉ះពាល់ដោយជំងឺនេះ៕
