Manchester United បានឃើញកំណត់ត្រា 143 ប្រកួតមិនគួរឱ្យជឿរបស់គេ ត្រូវបានកំទេចចោលដោយគូប្រជែងរួមទីក្រុង ពោលគឺ Manchester City នៅក្នុងជំនួប Manchester Derby ខណះដែលក្រុមភ្ញៀវបានរងបរាជ័យយ៉ាងអាម៉ាស់ជាទីបំផុត។
ក្រុមរបស់លោក Erik ten Hag បានចាប់ផ្តើមការប្រកួតយ៉ាងល្អនៅក្នុងកីឡដ្ឋាន Etihad ដោយការស៊ុតបញ្ចូលទីយ៉ាងអស្ចារ្យពីខ្សែប្រយុទ្ធ Marcus Rashford នៅនាទីទី 8 នៃការប្រកួតវគ្គទីមួយ។ ទោះយ៉ាងណាក្តី បិសាចក្រហមនៅមិនអាចទប់ទល់ការសម្រុកដ៏ហូរហៀររបស់ Man City បានវាយបកយកឈ្នះវិញក្នុងលទ្ធផល 3-1 ដោយកីឡាករ Phil Foden នឹង Erling Haaland សុទ្ធសឹងតែរកបានគ្រាប់បាល់រៀងៗខ្លួន។
ការបរាជ័យសម្រាប់ Man Utd ក្រោមថ្វីជើងក្រុមរបស់ Pep Guardiola មិនមែនជារឿងអ្វីដែលចម្លែកឡើយ ដោយសារតែទិន្ន័យនៃការប្រកួតគឺត្រូវបានគ្របដណ្តប់ស្ទើរតែទាំងស្រុងដោយក្រុមម្ចាស់ផ្ទះ ប៉ុន្តែកំណត់ត្រា 143 ប្រកួតរបស់ Man United បានបញ្ចប់ត្រឹមយប់ថ្ងៃអាទិត្យ ដោយនេះជាលើកទីមួយក្នុងរយះពេល 8 ឆ្នាំដែល Manchester United ភ្លាត់ស្នៀតចាញ់ទាំងដែលខ្លួននាំមុខគេមុននៅត្រឹមវគ្គទីមួយ។ គួររំលឹកផងដែរថា ការបរាជ័យចុងក្រោយបង្អស់ បានកើតឡើងនៅខែកញ្ញា ឆ្នាំ 2014 ក្នុងជំនួបទល់នឹង Leicester City ដែលបានបញ្ចប់ទៅដោយលទ្ធផល 5-3។ ក្នុងចំណោម 143 ប្រកួតនោះ Man Utd អាចរក្សាជ័យជម្នះបាន 123 ប្រកួត ខណះដែល 20 ប្រកួតផ្សេងទៀតបានបញ្ចប់ទៅដោយលទ្ធផលស្មើ៕
