Chelsea បានរារាំងការប៉ុនប៉ងរបស់ Bayern Munich ដើម្បីចុះហត្ថលេខាលើកីឡាករ Mykhailo Mudryk ក្នុងលក្ខខណ្ឌខ្ចីជើងក្នុងទីផ្សារដោះដូរកីឡាករខែមករាកន្លងទៅ។
យោងតាមអ្នកជំនាញផ្នែកទីផ្សារដោះដូរកីឡាករលោក Fabrizio Romano បានអោយដឹងថាក្លឹប Bayern Munich បានពិចារណាលើការផ្លាស់ប្តូរយឺតយ៉ាវក្នុងការចុះហត្ថលេខាលើខ្សែប្រយុទ្ធស្លាបឆ្វេង Chelsea ក្នុងលក្ខខណ្ឌខ្ចីជើងក្នុងទីផ្សារដោះដូរកីឡាករខែមករា បន្ទាប់ពីរបួសជង្គង់របស់ Kingsley Coman ប៉ុន្តែក្រុមមានមូលដ្ឋាននៅអង់គ្លេសមួយនេះបានរារាំងការប៉ុនប៉ងរបស់ Bayern។
ក្រុមតោខៀវមិនចង់ចែកផ្លូវជាមួយកីឡាករសញ្ជាតិអ៊ុយក្រែនរូបនេះឡើយ ដែលពួកគេបានចុះហត្ថលេខាក្នុងតម្លៃ ៨៩ លានផោន ពីក្លឹប Shakhtar Donetsk កាលពីឆ្នាំមុន។ ទោះបីជាលេងមិនសូវបានល្អ ហើយមិនសូវបានចាប់ផ្តើមជាជម្រើសដំបូងសម្រាប់លោក Mauricio Pochettino ក៏ពិតមែន ប៉ុន្តែ Mykhailo នៅតែត្រូវបានផ្តល់តម្លៃជាខ្លាំងនៅក្នុងក្រុម។ បន្ទាប់ពីពួកគេបរាជ័យក្នុងការនាំយកកីឡាករវ័យ 23 ឆ្នាំ ពី Chelsea ពេលនេះក្លឹបយក្ស Bundesliga បាននាំយក Bryan Zaragoza ពី Granada ជាកីឡាករជំនួសវិញ។ ពួកគេបានប្រកាសដំបូងកាលពីខែធ្នូថា Zaragoza នឹងចូលរួមជាមួយក្លឹបជាផ្លូវការនៅដើមរដូវកាល 2024-25 ប៉ុន្តែក្រោយមកពួកគេបានសម្រេចផ្លាស់ប្តូរយ៉ាងឆាប់រហ័ស ហើយនាំគាត់មកក្នុងរយៈពេលប្រាំមួយខែមុនកាលកំណត់៕
