លោក Sebestian Kehl ដែលជាប្រធានផ្នែកកីឡារបស់ក្លឹប Borussia Dortmund បានចេញមកផ្តល់ជាចម្លើយទាក់ទងនឹងពាក្យចចាមអារ៉ាមដែលថា Dortmund កំពុងពិចារណាក្នុងការនាំយកកីឡាករ Jadon Sancho មកកាន់ទឹកដីអាឡឺម៉ង់វិញជាលក្ខណះអចិន្ត្រៃយ៍។
Sancho បានត្រឡប់មកកាន់ក្លឹបចាស់របស់ខ្លួនវិញក្នុងលក្ខខណ្ឌខ្ចីជើងកាលពីខែមុន ដោយលែងបានចូលលេងក្នុងការប្រកួតសម្រាប់ Manchester United បន្ទាប់ពីមានជម្លោះជាសាធារណៈជាមួយអ្នកចាត់ការលោក Erik ten Hag។ រូបគេបានសម្របខ្លួនឡើងវិញយ៉ាងឆាប់រហ័សនៅក្នុង Bundesliga ផងដែរដែលបង្កឱ្យមានពាក្យចចាមអារ៉ាមថាគាត់អាចផ្លាស់ប្តូរមកកីឡដ្ឋាន Signal Iduna Park ជាលក្ខណះអចិន្ត្រៃយ៍នៅចុងបញ្ចប់នៃរដូវកាលនេះ។ ទោះជាយ៉ាងណាក៏ដោយ ប្រធានផ្នែកកីឡារបស់ Dortmund ផ្ទាល់បានសារភាពថាកិច្ចព្រមព្រៀងនេះនឹងក្លាយជាបញ្ហាប្រឈមមួយដែលពិបាកក្នុងការបញ្ចប់។
នៅពេលសួរដោយសារព័ត៌មាន Sky Sports ថាតើមានសង្ឃឹមក្នុងការចុះហត្ថលេខាលើ Sancho ក៏ដូចជាកីឡាករ Ian Maatsen នៅរដូវក្តៅដែរឬទេ Kehl បាននិយាយថា “ជាអកុសលសម្រាប់កីឡាករទាំងពីរ ជម្រើសទាំងពីរគឺពិតជាមិនប្រាកដនោះឡើយ។ ប្រសិនបើអ្នកដឹងពីអ្វីដែលយើងទទួលបានសម្រាប់ Jadon Sancho ពីរឆ្នាំកន្លះកន្លងមក អ្នកប្រាកដជាដឹងដែរថាឥឡូវនេះវាប្រហែលជាពិបាកខ្លាំងណាស់។ ជំហរចរចាបច្ចុប្បន្នគឺមិនមែនដូចដែលយើងអាចអនុវត្តវាបានទេ ដូច្នេះយើងមានតែទទួលតាមអ្វីដែលកំពុងតែកើតឡើងជាក់ស្តែង”៕
