ប្រធានក្លឹប Tottenham លោក Daniel Levy បានធ្វើការនិយាយទាក់ទងនឹងទង្វើរបស់ James Maddison ក្រោយរូបគេបានមកដល់ទីលានហ្វឹកហាត់ជាមួយនឹងឡានពណ៌ក្រហម។
Maddison បានរីករាយនឹងការចាប់ផ្តើមជីវិតដ៏ជោគជ័យនៅភាគខាងជើងទីក្រុងឡុងដ៍ បន្ទាប់ពីការផ្លាស់ប្តូររបស់គាត់ពី Leicester City នៅរដូវក្តៅ ប៉ុន្តែត្រូវបានចំអកយ៉ាងគួរឱ្យអស់សំណើចទាក់ទងនឹងជម្រើសរថយន្តរបស់គាត់ដោយប្រធានក្លឹប Spurs លោក Levy ក្នុងវេទិកាអ្នកគាំទ្រកាលពីល្ងាចថ្ងៃអង្គារ។ លោក Daniel Levy បាននិយាយថា “James គួរតែយល់ថារូបគេមិនអាចមកកាន់ទីលានហ្វឹកហាត់ជាមួយនឹងឡានពណ៌ក្រហមនោះឡើយ ខ្ញុំបានប្រាប់គេរួចហើយ ដូចនេះគេនឹងរៀនពីបទពិសោធន៍មួយនេះ”។
កីឡាករសញ្ជាតិអង់គ្លេស Maddison ហាក់ដូចជាការទិញដ៏ល្អមួយក្នុងចំណោមការចរចាទិញលក់ក្នុងរដូវក្ដៅក្នុងតម្លៃ 40 លានផោន។ កីឡាករវ័យ 26 ឆ្នាំរូបនេះបានស៊ុតបញ្ចូលទីបាន 2 គ្រាប់ និងបញ្ជូនបាល់ឱ្យមិត្តរួមក្រុមចំនួន 2 លើកក្នុងការបង្ហាញខ្លួន 5 ប្រកួតដំបូងក្នុងក្របខ័ណ្ឌ Premier League សម្រាប់ក្រុមរបស់លោក Ange Postecoglou ដែលជួយឱ្យពួកគេឡើងមកចំណាត់ថ្នាក់លេខ 2 ក្នុងតារាងពិន្ទុបណ្តោះអាសន្ន៕
