អ្នកចាត់ការទូទៅរបស់ក្រុមបិសាចក្រហម Manchester United លោក Erik ten Hag បានចេញមុខបន្ទោសកូនក្រុមរបស់លោក ក្រោយចាញ់ក្រុម Aston Villa យ៉ាងអាម៉ាស់បំផុតក្នុងលទ្ធផល 3:1 ក្នុងការប្រកួតនៅកីឡដ្ឋាន Villa Park។
នេះជាបរាជ័យលើកទី1សម្រាប់ក្រុម Man Utd គិតចាប់ពីថ្ងៃទី2 ខែតុលា ស្របពេលដែលលោក Unai Emery បានចាប់ផ្តើមអាជីពដឹកនាំនៅ Aston Villa យ៉ាងល្អក្នុងលីកកំពូលអង់គ្លេស English Premier League។ កីឡាករ Leon Bailey, Lucas Digne និង Jacob Ramsey រកបានម្នាក់មួយគ្រាប់ឲ្យក្រុមម្ចាស់ផ្ទះ។
ក្រោយចប់ការប្រកួត អ្នកចាត់ការសញ្ជាតិហូឡង់ ten Hag បាននិយាយចំៗថា “ពួកយើងចាញ់ការប្រកួតតាំងពីដើមតង់ទាំងពីរតង់ ហើយនេះជារឿងដែលយើងមិនអាចទទួលយកបាន។ ពួកគេ (Aston Villa) មានភាពរៀបរយជាងយើងឆ្ងាយណាស់។ យើងត្រូវតែមុតស្រួចជាងនេះ ព្រោះលទ្ធផលបានបង្ហាញយ៉ាងច្បាស់ វានេះជារឿងពិត។ ថ្ងៃនេះយើងល្អមិនទាន់គ្រប់គ្រាន់ ហើយការរៀបចំរបស់យើងនៅមានភាពរញ៉េរញ៉ៃ”៕
ប្រភព : GOAL
