ខ្សែប្រយុទ្ធ Harry Kane គ្រោងនឹងធ្វើការត្រឡប់ទៅកាន់ទឹកដីចាស់របស់ខ្លួនវិញនៅរដូវក្តៅខាងមុខនេះ ក្រោយក្លឹប Tottenham Hotspur នឹង Bayern Munich បានប្រកាសជាផ្លូវការថាក្លឹបទាំងពីរនឹងធ្វើការប្រកួតមិត្តភាពមួយមុនបើករដូវកាល 2024-2025។
ក្លឹបទាំងពីរបានកំណត់កាលបរិច្ឆេទជាផ្លូវការនៅព្រឹកថ្ងៃពុធ ដោយក្លឹបយក្សអាឡឺម៉ង់នឹងធ្វើដំណើរទៅលេងកីឡដ្ឋាន Tottenham Hotspur Stadium នៅថ្ងៃទី 10 ខែសីហា មួយសប្តាហ៍មុនពេលរដូវកាលថ្មីរបស់លីកកំពូលអង់គ្លេស Premier League ចាប់ផ្តើមនិងពីរសប្តាហ៍មុនពេល Bundesliga ចាប់ផ្តើមឡើងវិញ។
សំបុត្រប្រាកដជាលក់យ៉ាងលឿនសម្រាប់ការត្រលប់មកវិញរបស់ Kane បន្ទាប់ពីការផ្លាស់ទៅ Bayern កាលពីរដូវក្តៅមុន ខណៈដែលគាត់ត្រៀមប្រកួតទល់នឹង Tottenham ជាលើកដំបូងក្នុងអាជីពរបស់គាត់។ កីឡាករវ័យ 30 ឆ្នាំរូបនេះបានចាកចេញក្នុងលក្ខខណ្ឌដ៏ល្អ ហើយមានឱកាសត្រលប់មកវិញជាមួយនឹងការស្វាគមន៍កាន់តែធំធេង ប្រសិនបើគាត់ជួយក្រុមបច្ចុប្បន្នរបស់គាត់ក្នុងការទម្លាក់គូប្រជែងដ៏ជូរចត់របស់ Spurs ពោលគឺ Arsenal ចេញពីការប្រកួត Champions League វគ្គ 8 ក្រុមចុងក្រោយរបស់ពួកគេ៕
